"Номзодлар турнири". Накамура ҳам мағлуб этилди. Кетма-кет ғалабалар

Хабар берганимиздек, кеча мусобақада дам олиш куни эди. Айни дақиқаларда 5-тур учрашувлари ўтказиляпти ва қувонарлиси, амалдаги Жаҳон Кубоги ғолиби Жавоҳир Синдаров кетма-кет ғалабасини тантана қилди. Бу сафар ҳамюртимиз қора доналарда ўйнаганига қарамай, рейтингда ўзидан юқорида бораётган америкалик Ҳикару Накамурани мағлубиятга учрата олди. Бундан аввалги турда дунёнинг амалдаги учинчи рақамли шахматчиси америкалик Фабиано Каруана ҳам таслим этилган эди. 

Ушбу ғалабадан сўнг Жавоҳир 5 имкониятдан 4,5 очко тўплаб, турнир жадвалида якка пешқадамлигини давом эттирмоқда. Синдаров Жаҳон тожи учун ўйнаш имкониятини берадиган турнирда иштирок этаётган биринчи ўзбек шахматчиси ҳисобланади. Ўн тўрт турдан иборат мазкур турнир ғолиби жаҳон тожи учун ҳиндистонлик Гукеш Доммаражуга қарши дона суради.