"Номзодлар турнири". Синдаров тарихий натижа билан биринчи даврани якунлади

Хабар берганимиздек, кеча мусобақанинг 7-турида амалдаги Жаҳон Кубоги ғолиби Жавоҳир Синдаров дуранглар қироли номи билан танилган нидерландиялик Аниш Гири билан муросага келди. Бу билан ҳамюртимиз 7 имкониятдан 6 очко тўплаб, турнир тарихида биринчи даврани энг кўп балл билан якунлаган шахматчига айланди. Бундан аввалги рекорд Ян Непомняшийга тегишли бўлиб, 2022 йилги "Номзодлар турнири"нинг биринчи даврасида 7 имкониятдан 5,5 очко жамғарганди. 

Иккинчи давра олдидан Жавоҳир Синдаров 6 очко билан якка пешқадам бўлиб турибди. У энг яқин таъқибчиси Фабиано Каруанани 1,5 очкога ортга қолдирмоқда. Фаби 7-турда қора доналарда ҳиндистонлик Рамешбабу Праггнанандҳа билан дуранг ўйнади. Бу турда фақат Вей Йи ғалаба қозонди ва ҳақли равишда тур шахматчиси бўлди. Унга қадар Синдаров 4 та турда кетма-кет энг яхши бўлган эди. 

Бир кунлик танаффусдан сўнг, эртага "Номзодлар" турнирида иккинчи давра старт олади. Саккизинчи турда Жавоҳир россиялик Андрей Есипенкога қарши қора доналарда ўйнайди. Фабиано Каруана АҚШ дербисида Ҳикару Накамура билан ҳисоб-китоб қилади.