Новак Жоковичнинг ATP Якуний турнири финалидаги рақиби маълум

Дунёнинг саккизинчи ракеткаси бўлиб турган Новак Жокович мусобақанинг биринчи финалчисига айланган эди. Россиялик Андрей Рублёв ҳамда норвегиялик Каспер Рууд ўртасидаги иккинчи ярим финал учрашувида сербияликнинг бош соврин учун баҳсдаги рақиби маълум бўлди. 

Дунёнинг тўртинчи ракеткаси сифатида ҳаракат қилаётган Рууд ATP рейтингида еттинчи поғонадан жой олган россиялик ҳамкасбини ортиқча қийинчиликсиз мағлуб этди - 6/2, 6/4. Каспер ўзаро учрашувларда ҳамон ҳисобда ортда қолмоқда - 2:4. 

Роппа-роса 70 дақиқа давом этган баҳсда Рублёв 9, Рууд эса 10 та эйс зарбасини амалга оширган. Иккала теннисчи ҳам қўшхатога йўл қўйишмади. Фақат брейклар сони Касперда кўпроқ бўлди 4 га 1. Рууд фаолиятида илк бор ATP Finals турнирида бош соврин учун кортга чиқади. Ўтган йили биринчи маротаба ушбу турнирда қатнашган норвегиялик истеъдод эгаси 1/2 финалда россиялик Даниил Медведевга ютқазиб қўйганди.

Агар Рууд бугунги финалда ғалаба қозонса, Рафаэль Надални ортда қолдирган ҳолда мавсумни дунёнинг иккинчи ракеткаси сифатида якунлайди. Мағлуб бўлса ҳам у рейтингнинг учинчи поғонасига кўтарилиб олади. Каспер ва Новак ўртасидаги ўзаро учрашувларда тажрибали Жокович 3:0 ҳисобида олдинда бормоқда.