Нурмагомедов илк чемпионлик ҳимоя жангини ўтказади + ПОСТЕР

Россиялик аралаш яккакураш устаси 7 февраль куни БААнинг Дубай шаҳрида ўтказиладиган турнирда илк чемпионлик камари ҳимоясини ўтказади. Енгил вазндаги сўнгги Гран-при ғолибига айланган британиялик Алфи Дэвис мағлубият нималигини билмай келатётган россияликнинг рақиби бўлади.

Ташкилот келаси йилги биринчи чемпионлик жангини расман эълон қилди. 27 ёшли Усман Нурмагомедов шу йил ирландиялик Пол Хьюз билан икки марта жанг қилиб, ҳар иккисида ғалаба қозонди. Январь ойида ҳакамларнинг кўпчилик овози билан ғалаба қозониб, Bellator чемпионлик камарини ҳимоя қилган бўлса, октябрь ойидаги реванш жангида ҳакамларнинг якдил қарори билан зафар қучди.

Алфи Дэвис эса 2025 йилда турнирнинг финал жангида россиялик Гаджи Рабадановни ҳакамларнинг якдил қарори билан мағлуб этиб, енгил вазн тоифасида PFL Гран-приси ғолибига айланди.