Нурсултон Рўзибоев UFC'да навбатдаги синов олдида: Андрей Пуляевга қарши жанг нимаси билан аҳамиятли? (мутолаа учун)

Ҳамюртимиз мазкур оқшомда россиялик Андрей Пуляев билан ўрта вазн тоифасида жанг қилади.

Баҳс олдидан Рўзибоев фаворит сифатида кўрилаётган бўлса-да, бу қарама-қаршилик осон кечмаслиги аниқ. Пуляевнинг услуби ва сўнгги жанглари уни анча ноқулай рақибга айлантирмоқда.

Рўзибоев учун яна бир муҳим имконият

32 ёшли Нурсултон Рўзибоев бугунги кунда нафақат Ўзбекистон, балки Марказий Осиёнинг энг тажрибали ММА жангчиларидан бири ҳисобланади. У профессионал фаолияти давомида 47 марта октагонга чиққан бўлиб, ҳисобида 36 ғалаба, 9 мағлубият ва 2 дуранг мавжуд. Ғалабаларининг 20 тасини бўғиш ёки оғритиш усули, 13 тасини нокаут билан қўлга киритгани унинг ҳар икки йўналишда ҳам хавфли эканини кўрсатади.

UFC'даги дебютини 2023 йилда ёрқин тарзда ўтказган Рўзибоев кейинги йилларда ҳам турли даражадаги рақибларга қарши жанг қилди. У ўтган йили Эрик Макконикони техник нокаут билан мағлуб этди, ортидан эса тажрибали Дастин Штольцфус устидан ҳакамлар қарори билан ишончли ғалабага эришди. Шу тариқа юртдошимиз икки ғалабали серия билан Баку турнирига етиб келмоқда.

Аслида Рўзибоев ўтган йили Брайан Баттл билан жанг қилиши керак эди. Бироқ рақибнинг вазн меъёрини бажара олмагани сабабли баҳс бекор қилинган ва Нурсултон бир йилга яқин вақт расмий жанг ўтказмай қолганди. Шу боис Бакудаги жанг унинг рейтингдаги ҳаракати учун ҳам катта аҳамият касб этади.

Андрей Пуляев ким?

28 ёшли Андрей Пуляев ҳозирча UFC'нинг машҳур жангчиларидан эмас. Бироқ унинг услуби кўплаб экспертларни қизиқтириб қўйгани бор гап.

Россиялик спортчининг профессионал рекорди — 10 ғалаба ва 4 мағлубиятдан иборат. Унинг бўйи 193 сантиметр, қўл узунлиги эса тахминан 199 сантиметр бўлиб, бу кўрсаткич ҳатто Рўзибоевникидан ҳам узунроқ.

Пуляев UFC'да Кристиан Лерой Данкан ҳамда Атеба Готье каби кучли зарба эгаларига қарши жанг қилиб, ҳар иккисига ютқазган бўлса-да, уларни тўлиқ уч раунд ишлашга мажбур қилган. Айниқса, Готьега қарши баҳсда у рақибнинг ҳужумларини яхши нейтраллаштириб, унинг имкониятларини жиддий чеклай олган. Бу эса Пуляевнинг ҳимояси ва жангни ўқий билиш қобилияти юқори эканини кўрсатади. Нурсултон ҳам жанг олдидан айнан шу факторни алоҳида таъкидлаб ўтди.

Услублар тўқнашуви

Бу тўқнашувнинг энг қизиқ жиҳати — икки жангчининг услубида.

Рўзибоев фаол ҳужум қиладиган, рақибни босим остида ушлашни яхши кўрадиган универсал спортчи. У зарба алмашишдан ҳам, партерга тушиб, сабмишн қидиришдан ҳам қочмайди. Жангларининг катта қисми муддатидан аввал якунлангани ҳам бежиз эмас албатта.

Пуляев эса анча совуққон ҳаракат қилади. У кўпроқ масофани ушлаш, рақиб хатосидан фойдаланиш ва жангни тўлиқ "дистанция"га олиб чиқишга ҳаракат қилади. Шунинг учун ҳам уни нокаут қилиш осон эмас.

Қайси жиҳатлар ҳал қилувчи бўлиши мумкин?

Мутахассислар фикрича, Рўзибоев биринчи раундларданоқ юқори темп таклиф қилса, устунликка эришиш имконияти ортади. Чунки Пуляев жанг бошида эҳтиёткор ҳаракат қилади.

Бошқа томондан, жанг учинчи раундгача етиб борса, россиялик атлетнинг интизомли тактикаси ва масофани яхши ҳис қилиши унга имконият яратиши мумкин.

Шу билан бирга, Рўзибоевнинг сабмишн бўйича бой тажрибаси ҳам муҳим омил ҳисобланади. Агар ҳамюртимиз мана шу эпизодларини кўпайтирса, жанг тақдирини муддатидан аввал ҳал қилиш имконияти ортади.

Рейтинг учун катта қадам

Бу баҳс оддий прелим кард жангларидан бири эмас. UFC ўрта вазн тоифасида рақобат жуда юқори ва ҳар бир ғалаба жангчини рейтингга янада яқинлаштиради.

Рўзибоев учун кетма-кет учинчи ғалабани қўлга киритиш келгусида рейтингдаги рақибларга қарши жанг қилиш имкониятини оширади.

Қизиғи шундаки, жамоатчилик ва экспертларнинг катта қисми айнан Нурсултон Рўзибоев ғалаба қозонишини кутмоқда. Бироқ Пуляевнинг сўнгги чиқишлари шуни кўрсатмоқдаки, у фаворитларга жиддий муаммо туғдира оладиган жангчилар тоифасига киради.

Баку октагонидаги бу қарама-қаршилик нафақат икки спортчи, балки Ўзбекистон ММА мухлислари учун ҳам катта қизиқиш уйғотади. Агар Рўзибоев ўзининг энг яхши жиҳатларини намоён эта олса, унинг UFC'даги навбатдаги катта имконияти эшик қоқиши эҳтимолдан холи эмас. Жанг Тошкент вақти билан эртага 20:00 дан кейин бошланиши кутилмоқда.

Ҳамюртимизга омад тилаймиз!