Нурсултон Рўзибоевнинг ўзи UFC'даги жангини эълон қилди (ФОТО)

31 яшар ҳамюртимиз 17 август куни АҚШнинг Иллинойс штати, Чикаго шаҳрида ташкил этиладиган UFC 319 турнирида октагонга кўтарилади.

Унга турнир доирасида аввал айтилганидек, америкалик Брайан Баттл рақиблик қилиши ойдинлашди.

Эътиборлиси, беллашув кўпчилик тахмин қилганидек ярим ўрта вазн тоифасида эмас, Нурсултон сўнгги баҳсларини ўтказиб келаётган ўрта вазн тоифасида ташкил этилади.

"Кўришгунча, Чикаго. UFC 319", дея қуйидаги суратни изоҳлаган Нурсултон.

Маълумот учун, Андижонда туғилган Рўзибоев фаолияти давомида 47 та жанг ўтказиб, 36 ғалаба, 9 мағлубият ва 2 та дуранг қайд этган. У билан тенгдош, The Ultimate Fighter 29 шоусининг ғолиби Брайан Баттл ҳисобида эса 12 ғалаба ва 2 мағлубият бор. У сўнгги тўртта жангининг барчасида рақибларидан устун келган.

UFC 319 турнирининг марказий жанги ўрта вазн чемпиони Дрикюс Дю Плесси ҳамда даъвогар Хамзат Чимаев ўртасида кечади.