Нурсултон Шавкат Раҳмонов ва Хамзат Чимаев билан жанг қиладими? Рўзибоевнинг ўзи жавоб берди

Аралаш яккакураш устамиз мағлубиятсиз одимлаётган қозоғистонлик Шавкат Раҳмонов билан эҳтимолий жанг ҳақидаги берилган саволга ҳам жавоб қайтарди. 

— Сен ўрта вазн тоифасида жанг қиласан. Бу ердаги асосий юлдуз — Хамзат Чимаев. У билан эҳтимолий жангни қандай тасаввур қиляпсан?

— Бу жуда ҳам қизиқарли савол, — деди Рўзибоев. — Тўғриси, бу ҳақда ҳеч ҳам ўйламаган эканман. Шу ёки яна битта жангимдан кейин 77 кг вазнда ҳам ўзимни синаб кўрмоқчиман. Кейин бу саволингизни ўйлаб кўраман.

— 77 кг вазнда етакчилардан бири — бу Шавкат Раҳмонов. У билан жанг қилишга ҳам тайёрмисан?

— Авваллари қозоқ лигаларида жанг қилиб юрган пайтим, яъни UFC орзу бўлган даврларда жуда кўп одамлар Шавкат иккимизнинг жангимизни уюштириш учун ҳаракат қилган. Ўша пайтда Раҳмонов ҳам UFC`да эмасди. Ҳозир эса у рейтингнинг Топ-3 жангчиси. Агар ўша даражагача етиб борсам, нима учун йўқ.

Эслатиб ўтамиз, Нурсултон Рўзибоев 31 март куни АҚШнинг Нью-Жерси шаҳрида ташкил этиладиган UFC Fight Night турнирида америкалик Седрик Дюмага қарши октагонга чиқади.