Нурудинов Олимпиадада иштирок этадими? Федерация раис ўринбосари бу саволга жавоб берди

Оғир атлетикачимизга берилган жазо 2018 йилнинг 2018 йилнинг 18 декабридан кучга кирди ва 2020 йилнинг 17 декабрь куни якунига етади. 

Табиий савол туғилади: шу йил декабрь ойида дисквалификацияси якунланадиган Нурудинов 2021 йилнинг ёзига қолдирилган Токио Олимпиадасида иштирок эта оладими? Бу саволга Ўзбекистон оғир атлетика федерацияси раис ўринбосари Шаҳрулло Маҳмудовдан жавоб олдик.

"Ҳа, ҳақиқатан ҳам Русланнинг икки йиллик дисквалификацияси тасдиқланди. Адвокатимиз муддатни камайтириш бўйича суд жараёнларида қатнашди. Бу ҳолатда бериладиган муддат 4-5 йил ҳам бўлиб кетиши мумкин эди. Энг муҳими, биз Руслан Нуридинов қўлга киритган барча медалларни ўз кучида сақлаб қолишга эришдик. Шу йилнинг 17 декабрь куни дисквалификация муддати якунланади. Эртаси кунидан бемалол мусобақаларда иштирок этиши мумкин. Лекин Токио Олимпиадасида қатнаша олмайди. Биринчидан, унинг бугунги жисмоний ҳолати ва спорт формаси, иккинчидан, рейтингдаги ўрни. Русланнинг вазнида ёш атлетимиз Акбар Жўраев бор. Шу йил кузда 21 ёшга тўладиган бу спортчимиз катталар ўртасидаги жаҳон чемпионати совриндори ҳисобланади. Токио Олимпидасида унга катта ишонч билдиряпмиз. Руслан эса спорт формасини тиклаб бориб, келаси йили ўтказиладиган Осиё ва жаҳон чемпионатларида ўзини синаб кўради. Ҳаммаси ўзини қўлида. Насиб қилса, у бу иштироклари орқали 2022 йилги Осиё ўйинларига тайёргарлик кўради", - деди Ш.Маҳмудов.           

Маълумот учун, Руслан Нурудиновнинг 2012 йили Лондонда ўтказилган Олимпия ўйинларидаги допинг-таҳлили ижобий натижа берган эди. 

Суратда - Акбар Жўраев