ЎФА терма жамоалар бўлими собиқ раҳбари: "Аргентина бош тортди, биз эса Уругвай билан келишувга эришдик"

"Ўртоқлик ўйинлари бир ой олдин эмас, балки анча олдин тасдиқланади, шунинг учун октябрь ойининг биринчи санасида ҳали рақиб топа олмаганимизнинг илдизи сентябрга бориб тақалмайди.

Кузги ўйинларни ўтган йилдан бери излаб юргандик. Октябрь ойи учун бизда Аргентина ва Уругвай иштирокидаги Хитойдаги ўтказиладиган мусобақа варианти бор эди. Бу турнир ҳақида Равшан Сайфиддинович Эрматовнинг ўзи Хитой ассоциацияси раҳбарияти билан шу йилнинг баҳорида Малайзиядаги ОФК Конгрессида бўлганимизда гаплашганди. Бироқ, маълум ички сабабларга кўра, Хитой бу ўйинларни бекор қилди (охир-оқибат, ўзи ҳам октябрь ойида ўйнамайдиган бўлди), ўйинлар ҳомийси бўлган Хитой компанияси эса биз билан ушбу учрашувлар бўйича музокараларни давом эттирди, лекин энди ўйинлар Хитойда эмас, Малайзияда ўтказиладиган бўлди.

Маълум бир босқичда Аргентина ўйинларда иштирок этишдан бош тортди, биз эса 9 октябрь куни Малайзияда Уругвай билан ўйинни тасдиқладик. Шундан келиб чиқиб, октябрь ойининг иккинчи санаси - 13 ёки 14 октябрь учун вариантларни изладик. Аммо, август ойида Уругвай бизга 9-куни ўйнай олмаслигини маълум қилди ва ўйинни 13 октябрга кўчиришни ёки ўйинни бекор қилишни сўради.

Октябрь ойининг иккинчи санасига бўлган келишувларимизни бекор қилдик. Охирги паллада 9 октябрга вариантлар қидира бошладик. Юқори молиявий сўровлар туфайли Боливия билан келишувга эриша олмадик. Якунда улар Иордания билан ўйнайдиган бўлишди, Марокаш эса бизга қарши фақат ўз майдонида ўйнашга тайёр эди. Россия билан бўлган вариантни Хитойдаги мусобақа эҳтимоли пайдо бўлгани туфайли олдинроқ бекор қилиб юборгандик. Ушбу учта терма жамоа октябрь ойида расман МТЖ билан ўртоқлик ўйинида иштирок эта олишини тасдиқлаган эди.

Бу ёғига бундай тушунмовчиликлар бўлмаслиги керак. Ноябрь ойида кўплаб яхши даражадаги Африка терма жамоалари билан ўйнаш имконияти бўлади. Келаси йил март ойида эса Португалия терма жамоаси билан ўйнашимиз мумкин. Равшан Ирматовнинг шахсан ўзи собиқ ФИФА ҳаками ва ҳозирги кунда Португалия футбол федерацияси президенти Педро Проэнса билан гаплашганди. Шунингдек, Тошкентда FIFA Series мусобақасига мезбонлик қилиш имкониятимиз бор. ФИФАнинг янги мусобақасини ўтказиш учун аризани йил бошида топширган эдик. ФИФАдан эса яқиндагина жавоб келди, Жанни Инфантино Тошкентга келган вақти.

1 июнда эса ЖЧ-2026 мезбон терма жамоаларининг бири билан ўйнаймиз. Келишув имзоланиб ҳам бўлган. Муҳими, мундиалда ушбу терма жамоа билан бир гуруҳдан жой олмасак бўлгани," - дея ёзмоқда Шерзод Игамбердиев ижтимоий тармоқдаги саҳифаларидан бирида.