Оғир атлетика. Адҳамжон Эргашев жаҳон чемпиони!

Бугун мусобақа доирасида эркаклар ўртасида -62 кг вазн тоифасидаги спортчилар ўртасида баҳслар бўлиб ўтди, дея хабар бермоқда МОҚ матбуот хизмати. Қувонарлиси, мазкур вазн тоифасида олтин медаллар Ўзбекистон терма жамоаси аъзосига насиб этди. Адҳамжон Эргашев даст кўтаришда 135кг, силтаб кўтаришда эса 160кг тошни ўзига бўйсундира олди. Умумий ҳисобда 295 кг тош кўтарган Эргашев ҳар уччала йўналишда ҳам олтин медалга эга чиқди.

Қайд этиб ўтиш лозимки, Адҳамжон ўз вақтида ўсмирлар ўртасида жаҳон чемпиони, ўтган йили катталар ўртасида ўтказилган жаҳон чемпионатида эса бронза медали соҳибига айланганди.

Миллий олимпия қўмитаси ушбу муваффақият билан Ўзбекистон оғир атлетика федерациясини, спортчи ва унинг мураббийларини табриклайди.