Оғир атлетика бўйича Осиё чемпионатининг очилиш маросими бўлиб ўтди + ФОТО

Бугун Юнусободдаги "Ўзбекистон" спорт мажмуасида мусобақанинг тантанали очилиш маросими бўлиб ўтди. Унда Халқаро оғир атлетика федерацияси бош котиби Муҳаммад Жалуд, Ўзбекистон Миллий Олимпия Қўмитаси раиси Рустам Шоабдураҳмонов сўзга чиқди.

"Ўзбекистонга ташриф буюрганимдан жуда хурсандман. Очилиш маросимига тайёргарлик ажойиб даражада эканлигини кўриб турибман. Ўйлайманки, бутун мусобақа шу йўсинда давом этади. Ўзбекистон оғир атлетика майдонида етакчилардан бири. Юртингизда спортнинг бу турига бўлган эътибор ва унинг жадал суратларда ривожланаётганини таъкидламай илож йўқ. 

Осиё чемпионатига ташриф буюрган барча спортчиларга омад ва юқори натижалар қайд этишни тилаб қоламан" - деди  Халқаро оғир атлетика федерацияси бош котиби Муҳаммад Жалуд.

"Юртимиз йил бошидан буён бир неча нуфузли турнирларга мезбонлик қилиб келмоқда. Жумладан, пойтахтимизда дзюдо бўйича "Катта Дубулга" турнири, проффесионал бокс оқшоми, енгил атлетика бойича 3-Тошкент халқаро марафони юқори савияда ташкил этилди. Куни кеча Тошкентда яна бир нуфузли мусобақа, бадиий гимнастика бўйича Жаҳон кубоги старт олди. Бугун мана барчамиз оғир атлетика бўйича Осиё чемпионатининг очилиш маросимида кўришиб турибмиз. Мазкур масъулиятли мусобақада барча спортчиларимизга омад, куч ва зафарлар тилаб қоламан" - деди МОҚ раиси Рустам Шоабдураҳмонов.

Рустам Шоабдураҳмонов Осиё чемпионатини расман очиқ деб эълон қилганидан кейин мамлакатимиз мадҳияси янгради ва тадбирнинг бадиий қисмига навбат берилди. Уни Ўзбекистон Республикаси Мудофаа вазирлиги қошидаги ҳарбий оркестр бошлаб берди. Бадиий жамоаларнинг ёш раққослари иштирокидаги чиқишлар билан тадбир кўтаринки руҳда давом этди. 

Кечанинг бадиий қисми якунланганидан сўнг, бугунги кунга белгиланган вазндаги беллашувлар старт олди. Регламентга кўра, бугун аёллар ўртасида -49 кг вазн тоифасида Осиё чемпионатининг илк ғолиб ва совриндорлари аниқлаб олинди. Ўзбек спортчиларининг мусобақадаги иштироки эртага бошланади.

Хуршида Абдикулова тайёрлади

Фото: МОҚ матбуот хизмати