Оғир атлетика. Осиё чемпионатига тайёргарликнинг сўнгги босқичи давом этмоқда

Ушбу қитъа чемпионати Буэнос-Айресда бўлиб ўтадиган III ўсмирлар Олимпия ўйинларига йўлланма бериши билан ҳам аҳамиятлидир. 

Мусобақада иштирок этадиган ўзбекистонлик спортчилар 3 апрель куни ўқув-машғулот йиғинларини бошлаб юборганлар. Ўғил болалар терма жамоамиз Тошкент вилоятидаги Чорбоғ базасида машғулот олиб бораётган бўлсалар, қизларимиз чемпионат ўтказиладиган Урганч шаҳрида йиғинга киришганлар. 

Осиё чемпионатига 350 нафардан ортиқ спортчи ташриф буюриши кутилмоқда. Мураббий, расмий шахслар билан қўшиб ҳисоблаганда мамлакатимизга келадиган меҳмонлар сони 450 нафардан ошиб кетади. 

Қитъа чемпионатига тайёргарлик жараёнини кузатиш мақсадида Ўзбекистон Республикаси Жисмоний тарбия ва спорт вазири Шоакрам Исроилов айни пайтда Хоразмда бўлиб турибди. Вазир Осиё чемпионати иштирокчиларини қабул қиладиган меҳмонхоналар, мусобақа бўлиб ўтадиган спорт мажмуаси, чемпионат иштирокчилари ва меҳмонлар учун яратилган шароитлар билан яқиндан танишди. 

Осиё чемпионатида юртимиз шарафини ҳимоя қиладиган спортчиларимиз таркиби билан кейинроқ таништириб ўтамиз.