Оғир атлетика. Ўз уйингда деворлар ҳам суяйди ёхуд Хивада ўтган мусобақада мезбонлар тенгсиз!

Хива шаҳридаги Миллий ва Олимпия спорт турларига ихтисослаштирилган мактаб-интернатда 4 кун давом этган мусобақада жами 193 нафар ўсмир ва қизлар ғолиблик учун супачага чиқишди. Шундан 116 нафарини ўсмирлар, 77 нафарини эса қизлар ташкил қилди. Иштирокчилар ҳам ўсмирлар, ҳам қизлар ўртасида 10 тадан вазн тоифасида мусобақалашди.

Чемпионатда мезбонлар тўлиқ таркиб билан қатнашди (10 нафардан ўсмир ва қиз). Наманган ва Бухоро вилоятларининг эса қизлари тўлиқ таркиби билан иштирок этган бўлса, ўсмирлардан Қорақалпоғистон Республикаси ва Самарқанд вилоятидан 10 нафар спортчи супачага кўтарилди.

Медаллар жамғаришда кутилганидек мезбон Хоразм вилояти вакиллари жами 11та медаль (4та олтин, 4та кумуш, 3та бронза) билан 1-ўринни эгаллашди. 2-ўринни умумий 7та медаль (4-1-2) билан Андижон вилояти спортчилари банд этишган бўлса, кучли учликни 5та медаль (3-2-0) билан Бухоро вилояти спортчилари якунлаб беришди.

Кеча эса Хивада катталар ўртасидаги Ўзбекистон чемпионати бошлаб юборилди.