12 дек 12:51
Янгиликлар

Оғир атлетика

Оғир атлетика. Турсуной Жабборова Мисрдаги халқаро турнирда совриндор бўлди

Айни кунларда Миср пойтахти Қоҳира шаҳрида оғир атлетика бўйича қизлар ўртасида халқаро турнир ўтказилмоқда.

Олимпия ўйинларига рейтинг очколарини жамғариш имконини берадиган ушбу турнирда юртимиз шарафини Муаттар Набиева, Кумушхон Файзуллаева, Долера Давронова ва Турсуной Жабборовалар ҳимоя қилишмоқда.

10 декабрь куни ўтказилган баҳсларда -55 кг вазн тоифасида юртимиз шарафини ҳимоя қилган Муаттар Набиева даст кўтаришда 90 кг., силтаб кўтаришда эса 115 кг. тошни ўзига бўйсундириб ва олтин медаль соҳибасига айланган эди.

-76 кг вазн тоифасида иштирок этган спортчимиз Турсуной Жабборова эса даст кўтаришда 94 кг тошни ўзига бўйсундирди ва бронза медалини қўлга киритди. Силтаб кўтариш ва иккикураш якунларига кўра у тўртинчи натижани қайд этди.

Эртага, 13 декабрь куни ўтказиладиган баҳсларда Долера Давронова (-87 кг) супачага кўтарилади.