Ўлдириш билан таҳдид қилган UFC чемпиони Жон Жонс ҳибсга олинди

Полиция Жонсни антидопинг агентлиги вакилини ўлдириш билан қўрқитганликда айблаяпти. Drug Free Sport International ташкилоти ходимаси Кристал Мартинес Жонсга шундай айблов қўймоқда. Унинг айтишича, текширув гуруҳи 30 март куни тонги соат 4 да Жоннинг уйига борганда, у кучли алкогол таъсирида, яъни маст ҳолатда бўлган. Жонс ўлдириш билан таҳдид қилишдан ташқари текширувчининг мобил телефонини ҳам олиб қўйган.

Шу билан бирга Мартинес ўзи билан бирга бўлган ходим полицияга мурожаат этмаслигини айтганини ҳам қўшимча қилмоқда. 2024 йилнинг бошидан бери UFC жангчиларини допинг текширувдан ўтказаётган ташкилот раҳбари Жонснинг уйига борган ходимлардан UFC раҳбари билан гаплашиб олмагунига қадар жангчига айблов қўймасликни сўраган. Лекин аёл текширувчи полицияга мурожаат қилган. 

Ўз ўрнида Жон Жонс текширувчилар келган пайтда ҳақиқатан ҳам маст ҳолатда бўлганини тан олган. Аммо ўлим билан таҳдид қилганини инкор этган ва ҳатто ҳовли камерасига муҳрланган видеони ҳам полицияга тақдим этган. Видеода текширувчилар ва чемпион дўстона руҳда хайрлашаётгани акс этган.