Олимпиада чемпиони Данияр Елеусинов ўзбекистонлик боксчига қарши жанг ўтказади

Елеусинов Рио-2016 Олимпиадаси чемпиони бўлиб, ўшанда финал жангида ҳамюртимиз Шаҳрам Ғиёсовни ҳакамларнинг баҳсли қарори билан мағлубиятга учратган эди. 

"Данияр Елеусинов қачон рингга қайтади? Мендаги маълумотларга қараганда, у 27 апрель куни Алмати шаҳрида ташкил этиладиган "IBA Чемпионлар оқшоми"да рингга чиқади. Даниярнинг рақиби ўзбекистонлик Саиджамшид Жафаров бўлади. Жанг 71 килограмм вазн тоифасида 10 раундга мўлжалланган бўлади", — деди қозоғистонлик журналист Косанбай.

Маълумот учун, Данияр Елеусинов профессионал боксдаги сўнгги жангини 2021 йилнинг декабрь ойида ўтказганди. Ўшанда у аргентиналик Хуан Эрнан Леал (15-4-1, 4 КО)ни мағлубиятга учратган эди. Саиджамшид Жафаров ўтган йили Тошкентда ўтган жаҳон чемпионатида кумуш медални қўлга киритганди. У шунингдек, ҳаваскор боксда икки карра Осиё чемпиони ҳисобланади.