Озарбайжон сафида фаолият олиб бораётган Саиджамшид Жафаров Европа чемпионига айланди!

Хабарингиз бор, асли ўзбекистонлик боксчи Саиджамшид Жафаров ҳозирда Озарбайжон терма жамоаси шарафини ҳимоя қилмоқда.

Жафаров Озарбайжон сафида Европа чемпионатида ҳам иштирок этди ва аҳамиятлиси, мусобақанинг олтин медалини қўлга киритди. Бу World Boxing қаноти остидаги European Boxing ташкилоти томонидан ўтказилган тарихдаги илк Европа чемпионати эди. Қитъа биринчилиги 17 сентябрь куни старт олиб, эркаклар ва аёллар ўртасида 10 тадан вазн тоифаларида баҳслар ташкил этилди.

Бухорода туғилган ва Ўзбекистон сафида 2023 йилги Жаҳон чемпионатининг кумуш медалига сазовор бўлган Саиджамшид Европа биринчилигида 75 кг вазн тоифасидаги баҳсларда рингга чиқди. Ҳамюртимиз финал босқичида россиялик Исмаил Муцольгов билан жанг қилиб, 5:0 ҳисобида зафар қучди ва ўз фаолиятида биринчи маротаба Европа чемпионига айланди.