Олимпиадада сенсация: Украиналик Олександр Хижнякни нокаутга учратишди

Бугун бокс баҳсларида -75 кг вазн тоифасида финал жанги ташкил этилди. 

Финалда олтин медаль учун асосий даъвогар ҳисобланган Олександр Хижняк бразилиялик Хеберт Соузага қарши рингга кўтарилди. 

Жанг кутилмаганда нокаут билан якунланди. Учинчи раундда Соузанинг чап қўлдаги кучли зарбасидан сўнг Хижняк рингга қулади ва мувозанатни йўқотди. Ҳакам эса нокаут қайд этиб, жангни тугатди. 

Бу вақтга қадар Хижняк жангда устунликка эришаётганди ва икки раунд якунига кўра бир овоздан 20:18 ҳисобида ғалабага эришаётганди. 

Эслатиб ўтамиз, -75 кг вазн тоифасида Ўзбекистон шарафини Фанат Қаҳрамонов ҳимоя қилган ва иккинчи жангида қозоғистонлик Абилхан Аманкулга имкониятни бой бериб қўйганди.