Олимпия ва Осиё ўйинлари совриндорлари билан машҳур спорт мактаби фаолияти ўрганилди

Ўзбекистон Республикаси Жисмоний тарбия ва спорт вазирлиги Ишчи гуруҳи Наманган шаҳрида жойлашган Якка кураш спорт турларига ихтисослаштирилган болалар-ўсмирлар спорт мактабининг айни дамдаги ҳолати билан яқиндан танишишди.

Тўртта йирик базага эга бўлган спорт мактаби қошидаги спорт иншоотларида бир кунда 2 мингдан зиёд аҳоли турли спорт турлари бўйича машғулотларда банд бўлишади.

2016 йилда Наманган шаҳар ЯКСТИБЎСМга айлантирилган ушбу муассасада 15 спорт тури бўйича жами 80 нафар тренерлар 762 нафар спортчи ёшларга келажакда ҳар бир мусобақаларда юқори натижаларга эришиши йўлида сабоқ бериб келяпти.

Эътиборлиси, ушбу спорт мактабида Наманган вилоятида ягона бўлган замонавий велотрек базаси мавжуд. Ҳозирда 4 нафар тренер велоспортнинг оммалашуви йўлида хизмат кўрсатаяпти. 40 нафардан ортиқ ёшлар ушбу спорт тури билан профессионал даражада шуғулланмоқда.

Ушбу спорт мактабидан жаҳонга машҳур спортчилардан Олимпия ўйинлари ва жаҳон чемпионатлари совриндори Рустам Ассакалов, ёшлар ўртасида Жаҳон ва Осиё чемпиони Адҳам Эргашев, Осиё ўйинлари совриндорлари Баҳринисо Бобоева ва Мухлиса Абдумаликовалар етишиб чиққан.

Бундан ташқари ёш спортчилар ўртасида қатор халқаро мусобақалар ғолиблари тарбияланмоқда. Ушбу спорт мактабидан ҳозирда 66 нафар иқтидорли спортчилар Миллий терма жамоаларимиз аъзолари саналишади.