Олимпия захиралари коллежларида 2020/2021 ўқув йили учун қабул имтиҳонлари шаффоф ўтказилмоқда

Жумладан, бугун пойтахтимиздаги Республика Олимпия захиралари коллежида ҳам 2020/2021 ўқув йили учун касбий (ижодий) имтиҳонлар бошланди. Таъкидлаш керак, ушбу спорт таълим муассасасида имтиҳонлар адолатли, холис ва шаффоф ўтишни таъминлашга жиддий эътибор қаратилмоқда.

Имтиҳон жараёнлари бўлиб ўтаётган ҳар бир спорт иншооти дизенфикция қилинган. Шунингдек, коллежга кириш олдидан барча ўқувчилар дизенфекцион йўлакчадан ўтиб, шифокор ва ҳамширалар томонидан ҳарорати ўлчанмоқда. Сўнгра соғлиги жойида бўлган ўқувчи ёшларга имтиҳонларда қатнашишга рухсат берилади.

Таъкидлаш керак, жорий йил Республика Олимпия захиралари коллежига 296 нафар ўқувчи ҳужжат топширган бўлиб, улардан 145 нафари коллежга ўқишга қабул қилинади.

Икки йиллик танаффусдан сўнг Олимпия захиралари коллежларида яна миллионлар ўйини футбол йўналишига қабул эълон қилинди. 2020/2021 ўқув йили учун Республика Олимпия захиралари коллежининг футбол йўналишига 2007 йилда туғилган 66 нафар ўқувчи ҳужжат топширган бўлиб, улардан 24 нафари ушбу илм даргоҳига ўқишга қабул қилинади. Футбол йўналишида қабул имтиҳонлари 26-27 август кунлари ўтказилиши белгиланган.

Дарвоқе, Жисмоний тарбия ва спорт вазирлиги томонидан қабул имтиҳонларининг адолатли ва шаффоф ўтишини назорат қилиш учун масъуллар белгиланган бўлиб, Республика Олимпия захиралари коллежида ўтказилаётган қабул имтиҳонларини ҳам масъуллар назорат қилиб боришмоқда.