​"Олтин тўп"га даъвогарларнинг қачон эълон қилиниши маълум

2025 йилги "Олтин тўп" учун номзодлар 7 август куни эълон қилинади, деб хабар берди "France Football".

Париж жамоасининг Чемпионлар Лигаси финалидаги ғалабаси ва Испаниянинг Миллатлар Лигаси финалида Португалияга мағлуб бўлганидан сўнг Усмон Дембеле "Олтин тўп"ни қўлга киритиш учун фаворитига айланди. Франциялик футболчи ўтган мавсум ПСЖ сафида 49 ўйин ўтказиб, 33 та гол урган ва 15 та голга ассистентлик қилган. Дембеле парижликлар билан Чемпионлар Лигаси, чемпионат ва Франция Кубогида зафар қучди.

Ламин Ямаль ўтган мавсум "Барселона" сафида барча турнирларда 55 ўйинда майдонга тушиб, 18 та гол урди ва 25 та голли узатмани амалга оширди. У ўз жамоаси билан учта титулни қўлга киритди – чемпионат, Кубок ва Испания Суперкубоги.

Яна бир даъвогар "Барселона" вингери Рафинья. Бразилиялик футболчи якунланган мавсум 57 ўйинда иштирок этиб, 34 та гол урди ва 25 та голли пас узатди. Шунингдек, у жамоа билан учта ютуққа эришди Є чемпионат, Кубок ва Испания Суперкубоги.

Йилнинг асосий индивидуал мукофотига асосий даъвогарларнинг тўлиқ рўйхати қуйидагича кўринишда:

1. Усмон Дембеле (ПСЖ).

2. Ламин Ямаль ("Барселона").

3. Витинья (ПСЖ).

4. Муҳаммад Салоҳ ("Ливерпуль").

5. Рафинья ("Барселона").

6. Килиан Мбаппе ("Реал").

7. Жанлуижи Доннаррумма (ПСЖ).

8. Хвича Кварацхелия (ПСЖ).

9. Дезире Дуэ (ПСЖ).

10. Ашраф Ҳакими (ПСЖ).

Ўтган йили ушбу совринни Испания терма жамоаси ва Англиянинг "Манчестер Сити" клуби ярим ҳимоячиси Родри қўлга киритганди. Кучли учликка, шунингдек, Винисиус Жуниор ва Жуд Беллингем (иккиси ҳам "Реал") кирган эди.

"Олтин тўп" – ҳар йили Франциянинг "France Football" журнали томонидан йилнинг энг яхши футболчисига бериладиган мукофот.