Омад сабаб асосий тўрга қўйилган Мария WTA турнири ғолиби бўлди

Асосий тўр баҳсларига омадли мағлуб (лаки-лузер) сифатида қўйилган россиялик Мария Тимофеева фаолиятидаги дебют WTA турниридаёқ бош совринни қўлга киритди. Рейтингнинг 246-поғонасидан жой олиб турган Мария ҳал қилувчи финал учрашувида дунёнинг 80-ракеткаси, украиналик Катерина Байндлни 6/3, 3/6, 6/0 ҳисобида мағлубиятга учратди. 

Бу теннисчиларнинг ўзаро ўтказган илк учрашуви эди. Икки соату олти дақиқа давом этган баҳсда Тимофеева ҳам, Байндль ҳам эйс зарбасини амалга ошира олмади. Қўшхатолар иккала теннисчида ҳам биттадан бўлди. 

Ўзи учун тарихий бўлиб қолган Hungarian Grand Prix турниридаги муваффақиятли иштирок Тимофеевага 280 рейтинг очкоси ҳамда 29,760 евро мукофот пули келтирди. У бугун эълон қилинган рейтингда Топ-130`таликда дебют қилди.