"Она шер" Аманда Нуньес овга қайтмоқда, у чемпионлик камари учун жанг қилади + ПОСТЕР

Аманда 2026 йилнинг 24 январь куни АҚШнинг Лас-Вегас шаҳрида ўтказиладиган UFC 324 турнирининг co-main event, яъни муҳимлиги жиҳатидан иккинчи жангида амалдаги вазн чемпиони америкалик Кайла Харрисонга қарши октагонга чиқади. Бу хабарни расман UFC президенти Дана Уайт эълон қилди.

Маълумот учун, шу йилнинг июнь ойида дзюдо бўйича икки карра Олимпиада чемпиони ҳисобланган Кайла Харрисон Жулианна Пеньяни иккинчи раундда кимура усулида мағлубиятга учратиб, UFC чемпионлик камарини рақибасидан тортиб олганди. Кайла дунёнинг энг кучли Лигасидаги ўзининг учинчи жангидаёқ промоушен чемпионига айланган эди.  

Аманда Нуньес эса 2023 йилнинг июнь ойидан бери жанг ўтказмайди. Ўшанда у Ирен Алданани ҳакамларнинг якдил қарори эвазига мағлуб этган ва фаолиятини якунлаганини эълон қилган эди. Нуньес бу билан ўзига тегишли бўлиб турган икки вазндаги чемпионлик камарларини вакант, яъни эгасиз қолдирганди.