Ўртага миллион доллар қўйилган PFL 8 турнирида финалчилар маълум

Ушбу оқшом доирасидаги қизиқарли жангларда Гран-прининг эркаклар ўртасида оғир, аёллар орасида эса енгил вазн тоифаларида финалчилар аниқланди. Америкалик Кайла Харрисон биринчи раунддаёқ рақибаси Жен Фабианни техник нокаутга учратди. Тэйлор Гуардадо эса уч раунд тўлиқ давом этган жангда Мариана Мориасдан очколар бўйича устун келди.

Ўртага бир миллион доллар тикилган оғир вазн тоифасининг финал жангида эса хорватиялик Анте Делия ҳамда бразилиялик Бруно Каппелозза ўзаро тўқнаш келадиган бўлди. Анте россиялик Денис Гольцовни очколар ҳисобига кўра таслим этди. Каппелозза эса иккинчи раундда америкалик Жамилл Жонсни нокаутга учратди.

Оқшомнинг қолган натижаларига тўхталадиган бўлсак, Хенан Феррейра ва Аманда Лив рақибларини муддатидан аввал мағлубиятга учратишди. Россиялик Марина Мохнаткина ўзининг дебют жангида америкалик Клаудиа Заморани очколар ҳисобига кўра енгди.