Ортиқ Ниғматов Muscat International Chess Championship 2024 чемпиони!

Мусобақада уч нафар шахматчиларимиз ҳам муваффақиятли тарзда иштирок этди. Якунда яқиндагина гроссмейстерлик унвонини қўлга киритган Ортиқ Нигматов (2447) 9 имкониятдан 8 очко тўплаб, Muscat International Chess Championship 2024 чемпионига айланди. Ниғматов турнирда 5-рақам остида таснифланган бўлиб, 7 ғалаба ва 2 дуранг қайд этди. У 8-турда мусобақанинг биринчи тартиб рақамли шахматчиси ҳамюртимиз Абдумалик Абдусалимов (2536) билан муросага келди. 

Ортиқ Ниғматов ҳисобига қимматли +13.9 пункт рейтинг очколарини ҳам қўшиб олди. Ниғматов Ўзбекистонинг ҳисоб бўйича 30-гроссмейстери ҳисобланади. Ўмон турнирида 7,5 очко жамғарган Абдумалик Абдусалимов қўшимча кўрсаткичларга кўра 4-ўринни банд этди. Кучли учликдан жой олган мисрлик шахматчилар Ҳамед Вафа ва Адҳам Фавзи ҳисобида ҳам 7,5 очкодан бор. Алексей Барсов (2324) эса 7 очко тўплаган ҳолда 10-ўрин билан кифояланди.