Осиё чемпионати. Эркин курашчиларимизда 1 тадан кумуш ва бронза + ФОТО

Бугун эркин кураш бўйича мусобақа бошланди ва биринчи куни 5 та вазн тоифасида ғолиб ҳамда совриндорлар номи маълум бўлди. Саралаш баҳсларидан сўнг уч нафар курашчимизнинг кечки дастурда медаллар учун гиламга чиқиши ойдинлашганди. 

70 кг вазн тоифасида юртимиз шарафини ҳимоя қилган Сирожиддин Ҳасанов финалда олтин медаль учун курашди ва афсуски, қозоғистонлик Сирбаз Талгатга 2-6 ҳисобида имкониятни бой берди. 

57 кг вазндаги курашчимиз Нодиржон Сафаров бронза медали учун бўлиб ўтган учрашувда фаланстинлик Али Абурумайлани 12-2 ҳисобида мағлубиятга учратди. Терма жамоамизнинг 65 кг вазн тоифасидаги вакили Нодир Раҳимов эса бронза медали учун беллашувда эронлик Мортеза Гиаси Чекага ютқазди. 

Шу тариқа, эркин кураш бўйича Ўзбекистон терма жамоаси Осиё чемпионатининг биринчи кунида 1 та кумуш, 1 та бронза медалини қўлга киритди. Эртага қолган 5 та вазн тоифасида баҳслар ўтказилади.