Осиё чемпионати. Гулруҳбегимда ғалаба, Афрузада дуранг

Мукофот жамғармаси 80 000 АҚШ долларини ташкил этувчи мазкур мусобақада Ўзбекистон терма жамоаси ҳам катта таркибда қатнашяпти. Қитъа чемпионатининг аёллар ўртасидаги баҳсларида 23 давлатдан 101 нафар иштирокчи медаллар учун дона сурмоқда. 

Терма жамоамиз етакчилари 8-турда муҳим очколарни ўз ҳисобларига қўшиб қўйишди. Ёшлар ўртасида икки карра жаҳон чемпиони Афруза Ҳамдамова қора доналарда ҳиндистонлик Гейт Свати билан дуранг ўйнади. Гулруҳбегим Тоҳиржонова эса оқ доналарда россиялик Анастасия Бондарукни мот билан ютди. 

Тажрибали шахматчимиз Нодира Нодиржонова сингапурлик рақибаси билан муросага келди. Бу турда Гулдона Каримова, Асал Салимова, Умида Омонова Маржона Маликова ва Нилуфархон Имомқўзиева рақибларини мағлуб этишни уддалашди. Зилола Актамова, Лилия Белая, Рукия Олимова, Мадинабону Халилова ва Одина Олимова мағлубият аламини тотиб кўришди. Моҳим Ўрозмуҳаммедова дуранг ўйнади. 

Саккизинчи турдан сўнг қизларимиз орасида энг яхши натижани Гулруҳбегим Тоҳиржонова қайд этиб турибди. У 6 очко билан қўшимча кўрсаткичларга кўра 9-поғонадан 6-ўринга кўтарилиб олди. Иккинчи ўринни эгаллаб турган ҳиндистонлик Срижа Сешадри ҳисобида ҳам 6 очко бор. Мўғулистонлик Бат-Эрдене Мунгунзул 7 очко билан якка карвонбошиликни давом эттирмоқда. Ҳамдамова 5,5 очко билан 11-поғонадан жой олган. 

Бугун ўтказиладиган 9-турда Тоҳиржонова қора доналарда ўзи сингари 6 очкога эга бўлиб турган хитойлик Сонг Юсинга қарши баҳс олиб боради. Гулруҳбегим жаҳон Кубогига бериладиган йўлланма учун жуда ҳам яқин турибди. Ҳамдамова эса оқ доналарда ўзи сингари 5,5 очкога эга россиялик Мария Якимова ҳисоб-китоб қилади.