Осиё чемпионати. Воҳидовда муҳим ғалаба ва у иккинчи ўринга кўтарилиб олди

Мукофот жамғармаси 80 000 АҚШ долларини ташкил этувчи мазкур мусобақада Ўзбекистон терма жамоаси ҳам катта таркибда қатнашяпти. Қитъа чемпионатининг эркаклар ўртасидаги баҳсларида 33 мамлакатдан 156, аёлларда эса 23 давлатдан 101 нафар иштирокчи медаллар учун дона сурмоқда. 

Эътиборлиси, бунгача Европа қитъаси мусобақаларида қатнашган ва бир муддат турнирлардан четлатилган Россия терма жамоаси шахматчилари ҳам мазкур Осиё чемпионатида медаллар учун кураш олиб боришяпти. 

Осиё чемпионатининг 7-турида ҳамюртларимиз орасида энг яхши кўрсаткичга эга бўлиб турган гроссмейстеримиз Шамсиддин Воҳидов (2641) қора доналарда ўйнашига қарамай, хитойлик халқаро мастер Янг Зилонгни мағлубиятга учратди ва 5,5 очко билан қўшимча кўрсаткичларга кўра 2-ўринга кўтарилиб олди. Осиё чемпионатида қатнашаётган биринчи рақамли шахматчимиз Нодирбек Якуббоев (2665) қора доналарда бошқа бир Чин юрти гроссмейстери Даи Чангрен (2531) билан дуранг ўйнади. 

Муҳиддин Мадаминов оқ доналарда ҳиндистонлик таниқли гроссмейстер Лука Мендонкани мағлуб этишни уддалади ва очколарини 5 тага етказиб олди. Муҳаммадзоҳид Суяров ҳиндистонлик гроссмейстер Наранаянга ютқазди. Бу турда ҳамюртларимиздан Ҳумоюн Бегмуратов, Миразиз Матёқубов ва Саидхон Ашикмамутов ғалабага эришди. Орият Обиджонов, Асилбек Абдулазизов, Асроржон Омонов, Баҳром Бахриллаев рақиблари билан муросага келишди.

Мусобақа пешқадами эронлик Бардия Данешвар (2621) 6-турда дуранг ўйнаганига қарамай, 6 очко билан ҳамон турнир жадвалида якка пешқадамлигини давом эттирмоқда. Шамсиддин Воҳидов 5,5 очко билан иккинчи ўринга кўтарилиб олди. Россиялик Иван Землянский ҳисобида ҳам 5,5 очко бор ва у қўшимча кўрсаткичларга кўра кучли учликка якун ясаган. Муҳиддин Мадаминов кечаги муҳим ғалабаси эвазига 5 очко билан 12-поғонадан 6-ўринга юқорилади. Нодирбек Якуббоев 4,5 очко билан 25-поғонадан жой олган. 

Бугун Осиё чемпионатида 7-тур партиялари ўйналади. Шамсиддин Вохидов оқ доналарда асосий таъқибчиси Иван Землянский билан ҳисоб-китоб қилади. Данешвар Бардия ҳам оқ доналарда ўйнайди. Унинг рақиби ҳиндистонлик гросммейстер Пураник Абҳиманю бўлади. Муҳиддин Мадаминов қора доналарда ҳиндистонлик Наранаянга қарши баҳс олиб боради.