Осиё чемпионатининг иккинчи кунида ҳам 12 та медалга эга чиқдик

Мусобақанинг иккинчи кунида ҳам полвонлар яна саккиз вазн тоифасида ғолиблик учун гиламга тушди.

Осиё чемпионати вакилларимиз учун омадли келди. Мусобақанинг иккинчи кунги баҳсларида Шуҳрат Арслонов бошчилигидаги терма жамоамиз аъзолари 12 медални қўлга киритди. Шундан тенг ярмини олтин медаллар ташкил қилди.

Ёш полвонларимиздан Ҳасан Ботиров (-55 кг), Санжар Саидқулов (-60 кг), Сардорбек Жангелдиев (-66 кг) ҳамда Жалолиддин Бойназаров (-73 кг), қизлар ўртасида эса Маликахон Қаҳҳарова (-70 кг) ва мутлақ вазнда Рината Илматовалар шоҳсупанинг энг юқори поғонасига кўтарилган бўлса, Илҳом Фармонов (-55 кг), Менгдона Чориева (-63 кг), Садоқат Тўраева (-70 кг) ҳамда Шоҳиста Аноровалар (-78 кг) кумуш медаль билан тақдирланди.

Яна икки нафар курашчимиз Паҳлавон Мансуров (-73 кг) ҳамда Шаҳнозахон Бозорова (-63 кг) бронза медалига сазовор бўлди.

Фақат иккита вазнда олтин медаллар ўзга юрт спортчиларига насиб этди. Вьетнамлик Нгуен Ти Нгос (-63 кг) ҳамда Хитой Тайпейи терма жамоаси аъзоси Янг Ли-Май (-78 кг) ёшлар ўртасида Осиё чемпионлигини қўлга киритди.

Шундай қилиб, 16 та вазн тоифасида ўтказилган мусобақада жами 24 та (12 та олтин, 10 та кумуш ва 2 та бронза) медални қўлга киритган полвонларимиз умумжамоа ҳисобидан биринчи ўринни эгаллашди. Кейинги ўринларни эса Хитой Тайпейи ва Вьетнам жамоалари банд этишди.

Ушбу мусобақада иштирок этган терма жамоамиз аъзолари 25 июнь куни юртимизга қайтиб келишади.