Осиё ўйинлари-2018. Қозоғистон олтин медаллар сони бўйича бизга етиб олди

Бугун мусобақанинг тўққизинчи кунги баҳслари давом этаётган бир паллада Қозоғистон терма жамоаси олтин медаллар сони бўйича бизга етиб олди. Ён қўшниларимиз ҳозиргина каратэнинг кумитэ баҳсларида 18-Осиё ўйинларидаги ўзларининг олтинчи олтин медалларини қўлга киритишди. 

-68 кг вазн тоифасида ўтган баҳсларда Гўзалия Гафурова шохсупанинг энг юқори поғонасига кўтарилди. У ҳал қилувчи финал жангида хитойлик Тан Линьлинни мағлубиятга учратди. Ҳамюртимиз Дилдор Аннадурдиева биринчи босқичда айнан бўлажак чемпионга имкониятни бой берган эди. 

Бу Қозоғистон терма жамоасининг ушбу Осиё ўйинларидаги 42-медали бўлди. Қўшниларимизда 6тадан олтиндан ташқари 8та кумуш ва 28та бронза медали ҳам бор. Кумуш медаллар сони бизда 11талиги сабабли умумжамоа ҳисобида Ўзбекистон 10-ўринни эгаллаб турибди. 

Фото манбаси: sports.kz