Осиё ўйинлари-2018. Учта медал билан 8-ўриндамиз, ҳозирча!

Кечаги кун баҳсларидан сўнг Ўзбекистон терма жамоаси медаллар жамғариш бўйича жадвалда 8-ўринни эгаллаб турибди. Эркин курашчиларимиз терма жамоамиз ҳисобига 1та олтин, 2та бронза медалини қўшиб қўйишди.

Хабар берганимиздек, -74 кг вазн тоифасидаги полвонимиз Бекзод Абдураҳмонов барча рақибларини мағлубиятга учратиб, Осиё ўйинлари чемпиони бўлди. -97 кг вазн тоифасидаги Магомед Ибрагимов ҳамда -65 кг вазндаги вакилимиз Сирожиддин Ҳасанов бронза медалини қўлга киритди. 

Жами 16та медални қўлга киритиб улгурган Хитой терма жамоаси кутилганидек медаллар жамғариш бўйича биринчи ўринни эгаллаб турибди. Чин юрти вакиллари 7та олтин, 5та кумуш, 4та бронза медали билан тақдирланишган. 

Ўн битта давлат спортчиларига камида битта олтин медал олиш насиб қилди. Ён қўшниларимиз қозоғистонлик спортчилар 1та олтин, 1та кумуш, 2та бронза медали билан 5-поғонадан жой олишган. Қирғизистон терма жамоаси 1та кумуш медалга сазовор бўлган.