Отабек Шукуров: "10 киши бўлиб қолган Эронни юта олмаганимизда роса гапиришган эди. Мана бугун 10 киши бўлиб Эронни мағлуб қилдик"

Отабек Шукуров: "10 киши бўлиб қолган Эронни юта олмаганимизда роса гапиришган эди, бу футбол. Мана бугун 10 киши бўлиб Эронни мағлуб қилдик. Бу жамоани Эрон ҳам, Осиё ҳам кўп эслайдиган бўлади. Мундиалда яхши натижалар қайд этиб, тарихни янгилашга ҳаракат қиламиз".

- Жаҳон чемпионатида қайси топ терма жамоа билан бир гуруҳда бўлишни хоҳлайсиз?

- Аниқ биттасини айта олмайман. Бразилия, Испания, Португалия ёки Аргентина... Бу биз учун яхши имтиҳон бўлади. Мундиалга чиқдикми, шундай кучли жамоалар билан ўйнасак янги тарих ёзган бўламиз.

- Фабио Каннаваро келганидан кейинги ўзгаришлар ҳақида нима дея оласиз?

- Жисмоний ҳолат ҳақида гапирадиган бўлсак, буни миллий жамоага келиб, ўзгартириб бўлмайди. 1 ҳафтада улгурмайсиз. Ҳар бир футболчи профессионал сифатида ўз ҳолатини назорат қилиб бориши керак. Фабио Каннавародек мураббий келиши биз учун катта ютуқ. Ҳали ўрганиб улгурмадик, аммо янги нарсаларни кашф қилишда давом этяпмиз.

- Бош мураббий ҳар бир футболчи билан кўпроқ гаплашишга ҳаракат қиляпман деди. Сиз миллий жамоа етакчисисиз, у сиз орқали йигитларга нималарни етказишга ҳаракат қиляпти?

- Терма жамоа устози футболчилар билан мулоқотда бўлиши жуда яхши. Каннаварода кўрган жиҳатларни Пирлода ("Фотиҳ Карагюмрюк"да) ҳам кўрган эдим. Бунинг барчаси жамоани кучайтириш, натижаларни яхшилаш учун қилиняпти.

- Сиз ҳам U17 мундиалда иштирок этгансиз, бугун турнирни тарк этган укаларингизга нима деган бўлардингиз?

- Автобусда уларнинг ўйинини кўриб келдик. Афсуски демаган бўлардим, чунки йигитлар ҳамма билан муносиб ўйин кўрсатишди. Жаҳон чемпионати ҳам битта оддий турнир. Буёғига улар ўзини йўқотиб қўймаслиги керак, чунки ўтиш ёшида туришибди. Москвада бу болалар билан ҳам учрашган эдим. Ҳали ҳаммаси олдинда, уларнинг келажаги порлоқ. Келажакда миллий жамоа ва Европанинг топ клубларида ўйнаш насиб қилсин. Ким нима деса десин, улар ҳақиқий қаҳрамонлар.