Ўзбекистон чемпионатида энг кучли пауэрлифтингчилар аниқланди ФОТОГАЛЕРЕЯ

Уч кун давом этган баҳсларда ёшлар класик, катталар эпикировка йўналишларида ўз маҳоратларини синовдан ўтказишди. Ўзбекистон пауэрлифтинг федерацияси раиси Ислом Исломовнинг маълум қилишича чемпионатда 121 нафар спортчи иштирок этди. 

Улар мос равишда Ангрен, Олмалиқ, Чирчиқ, Зарафшон, Учқудуқ, Тошкент, Бухоро, Нукус ва Наманган жамоалари шарафини ҳимоя қилдилар. Қизғин беллашувлар якунида ғолиблар номи аниқланди. Евгений Капралов, Метин Гафуров, Надежда Малюгина ўз йўналишларида чемпионлик шоҳсупасига кўтарилди. Уларга медаль, диплом ва қимматбаҳо совғалар топширилди.

Пауэрлифтинг бу куч спорти бўлиб, унинг моҳияти спортчи учун ниҳоятда оғир бўлган оғирликнинг қаршилигини енгишдан иборат. Пауэрлифтинг оғир атлетикачиларнинг асосий ҳаракатларда самарадорликни ошириш учун ишлатадиган машқларидан келиб чиққан бўлиб ўтган асрнинг 40-50 йилларида Ғарбда машҳурликка эришди. 

XX асрнинг 50-60 йилларида эса замонавий шаклда пауэрлифтинг шакллана бошлади. Ўтган асрнинг 60-йиллари ўрталарига келиб мусобақа қоидалари белгиланиб, миллий даражадаги чемпионатлар мунтазам ўтказила бошланди.

1972 йил ноябрь ойида Халқаро пауэрлифтинг федерацияси ташкил этилди. У Халқаро парамия қўмитаси ва дунё антидопинг агентликларининг аъзоси ҳисобланади. 2000 йилдан бошлаб Халқаро паралимпия ўйинларида пауэрлифтинг бўйича ҳам расмий баҳслар ўтказиб келинади.

Мазкур спорт юртимизда ҳам йилдан йилга оммалашиб бормоқда. Ўзбекистон пауэрлифтинг федерацияси томонидан мунтазам миллий чемпионатлар, нуфузли турнирлар ташкил этилмоқда. Халқаро мусобақаларда ўзбекистонлик спортчилар юртимиз шарафини муносиб ҳимоя қилиб келишмоқда.