Ўзбекистон Осиё чемпионати 1/2 финалига чиқиш баробарида Жаҳон чемпионати йўлланмасини ҳам қўлга киритди + ФОТОГАЛЕРЕЯ

Ҳозиргина "Алпомиш" муз саройида А гуруҳи етакчилари Ўзбекистон ва Хитой терма жамоалари ўзаро ҳисоб-китоб қилишди. Муросасиз кечган ўйинда Чин юрти қўл тўпи усталари 29:25 ҳисобида ғалаба қозонишди. Биринчи бўлимда хитойликлар 16:13 ҳисобида зафар қучишди. Иккинчи бўлимда қизларимиз астойдил ҳаракат қилишди ва бир тўп фарқи билан ютқазишди. 

Шу тариқа, Хитой терма жамоаси юз фоизлик натижа билан гуруҳимизда якка пешқадам бўлиб олди. Ўзбекистон терма жамоаси иккинчи ўрин билан 1/2 финалга йўл олди. Бугун Ҳиндистонни 31:28 ҳисобида мағлуб этган Хитой Тайпейи терма жамоаси гуруҳда учинчи бўлди ва энди 5-8 ўринлар учун курашни давом эттиради. 

Бугунги ўйинлар доирасида Эрон Қирғиз Республикасини 77:12, Корея Республикаси Японияни 23:21 ҳисобида енгди. В гуруҳидан Корея Республикаси ва Япония терма жамоалари 1/2 финалга йўл олишди. 

Қувонарлиси, Ўзбекистон терма жамоаси 1/2 финал йўлланмаси билан бирга жаҳон чемпионати йўлланмасини ҳам қўлга киритди. Регламентга кўра, ярим финалга етиб келган 4 терма жамоа жаҳон чемпионати чиптасига эга чиқди.