Ўзбекистон ўсмирлар терма жамоаси иштирокида онлайн машғулот ўтказилди

Ушбу машғулотларни Ўзбекистон бокс федерацияси раисининг биринчи ўринбосари Сакен Полатов, бош котиб Муроджон Мамадалиев ҳам кузатиб борди. 

Машғулотларни ўсмирлар терма жамоаси бош мураббийи Бекзод Хидиров олиб борди. Йигитларимиз эса берилган топшириқларни астойдил бажаришди. 

Онлайн машғулот давомида федерация раҳбарияти томонидан шундай рухда давом этиш лозимлиги, яқин орада ўқув-машғулот йиғинлари бошланиши таъкидланди.

"Хабарингиз бор, Республика комиссияси томонидан карантин чоралари 1 июнга қадар узайтирилди. Ушбу жараён аста-секин юмшатилаётган бўлсада, ҳали тўлиқ бекор қилингани йўқ. Шу сабабли, ҳозирча уй шароитида машғулотларни давом эттириб турамиз. Насиб бўлса, яқин кунлар ичида навбатдаги ўқув-машғулотлар кунларига аниқлик киритилади. Ҳозирча эса карантин қоидаларига амал қилишимиз лозим", - деди Муроджон Мамадалиев.