Ўзбекистон самбо ассоциациясида бир неча вилоят бўлимлари ташкил этилди

Кеча Тошкент шаҳрида ташкилот йиғилиши бўлиб ўтди. Йиғилишни Ўзбекистон самбо ассоциацияси раиси Алишер Алимов олиб борди. Унда бир қатор ташкилий масалалар кўриб чиқилди.

Жумладан, Тошкент вилоятида ҳам эндиликда Ўзбекистон самбо ассоциациясининг бўлими иш бошлади. Йиғилиш давомида бўлимга Комилжон Адилов раҳбар этиб сайланди. Маълумот ўрнида, Комилжон Тошпўлатович Адилов 1986 йили Тошкент вилоятида туғилган. Бугунги кунда Тошкент вилояти Жисмоний тарбия ва спорт бошқармасида фаолият олиб бормоқда. 

Бундан ташқари, ўтказилган йиғилиш давомида Жиззах вилояти бўлими ҳам ташкил этилгани эълон қилинди. Унга Умаров Бахтиёржон Маҳмудович раҳбар этиб сайланди. Маълумот учун, Б.Умаров 1984 йилда Самарқанд вилоятида таваллуд топган. Бугунги кунда Миллий гвардия қўмондонлиги, Жиззах вилоятидаги ҳарбий қисмларидан бирида командир сифатида фаолият олиб бормоқда. Шунингдек, Жиззах вилояти бош мураббийи этиб Ҳасан Бобоев фаолият олиб борадиган бўлди. Вилоят аёллар терма жамоасига Ойжамол Тўйметова, ўсмирлар жамоасига эса Муҳаммад Умрқулов бош мураббий этиб сайланди.  

Шунингдек, фаолиятида камчиликлар кўзга ташлангани учун Темир Умиров самбо ассоциацияси раиси ўринбосари лавозимини тарк этди. Унинг ўрнига Азамат Гулямов бир овоздан Ўзбекистон самбо ассоциацияси раиси ўринбосари этиб сайланди.

Йиғилишда мутасаддиларга ўз ҳудудларида самбони янада ривожлантириш, ишни ташкил этиш бўйича мақсад ва вазифалар белгилаб берилди. (https://t.me/uzbekistan_sambo/1972) 

Ўзбекистон самбо ассоциацияси матбуот хизмати