Ўзбекистон терма жамоаси жаҳон чемпионати яккалик баҳсларидаги иштирокини якунлади

Хабар берганимиздек, бугун оғир вазн (аёллар +78, эркаклар +100 кг) тоифасида ғолиб ва совриндорлар аниқланади. Бугунги беллашувларда медаль йўлида сўнгги умидларимиз бўлган Ирисхон Қурбонбоева ҳамда Париж-2024 Олимпиадаси совриндорлари Музаффарбек Тўрабоев ва Алишер Юсупов татамига чиқди. 

Афсуски, биринчи босқичдан муваффақиятли ўтиб олган дзюдочиларимиз иккинчи даврада мағлубият аламини тотиб кўришди. Ўтган йилдан энг оғир вазнга ўтган Қурбонбоева япониялик рақибасига имкониятнни бой берди. Тўрабоев IJF байроғи остида курашаётган Инал Тасоевга, Юсупов эса икки каррадан Олимпиада ва жаҳон чемпиони, чехиялик Лукаш Крпалекка ютқазди. Алишернинг мағлубияти айниқса аламли бўлди. Иккита юко баҳси билан бораётган дзюдочимиз ҳужумга берилиб кетиши натижасида аламли мағлубиятни қабул қилиб олди. 

Шу тариқа, Ўзбекистон терма жамоаси жаҳон чемпионатидаги иштирокини медалсиз якунлади. Сўнгги бор 2018 йилги жаҳон чемпионатида шундай ҳолат кузатилганди. Терма жамоамизда мураббийлар штаби алмашган, дзюдочиларнинг аксарияти учун бу илк жаҳон чемпионати бўлди. Мана шу омиллар омадсиз иштирокимизга сабаб бўлди. 

Умид қиламизки, эртага ўтказиладиган аралаш жамоавий баҳсларда терма жамоамиз жаҳон чемпионати медалларига эга чиқади. Илк даврада Туркманистон терма жамоасига қарши татамига чиқамиз.