Ўзбекистон U-16 Бутунжаҳон Олимпиадаси вице-чемпиони!

Нуфузли мусобақада дунёнинг 45 давлатидан жами 90 та жамоа бош соврин учун баҳс олиб борди. Ўзбекистон терма жамоаси мусобақада ўртача рейтинг бўйича 2-ўринда қайд этилган эди ва якунда ўринга мос тарзда Ўсмирлар Олимпиадасининг кумуш медалига сазовор бўлди. 

Халқаро гроссмейстер Сайдали Юлдашев бош мураббийлигидаги Ўзбекистон терма жамоаси таркибида халқаро спорт усталари Ҳумоюн Бегмуратов (2435), Муҳаммадзоҳид Суяров (2356), FIDE спорт устаси Асроржон Омонов ва аёллар халқаро спорт устаси, ёшлар ўртасида икки карра жаҳон чемпиони Афруза Ҳамдамова Олимпиада вице-чемпионларига айланишди.  

Олимпиаданинг сўнгги куни 9-тур учрашувлари ўтказилди. Унда ўсмирларимиз Италия терма жамоасига ҳеч қандай имконият қолдиришмади - 4:0. Биринчи доскада пешқадам FIDE 1 жамоаси FIDE 2 шахматчиларидан 3,5:0,5 ҳисобида устун келди. 

Барча 9 та учрашувда ғалабага эришган ва рейтинг бўйича ҳам биринчи ўринда бўлган FIDE 1 терма жамоаси Бутунжаҳон Ўсмирлар Олимпиадаси чемпионлигини қўлга киритди. Биз сингари 14 очко жамғарган Қозоғистон терма жамоаси қўшимча кўрсаткичларга кўра бронза медалига сазовор бўлди. 14 очкога эга Хитой 4-ўринни банд этди. Ўзбекистон терма жамоаси Олимпиадада 7 ғалаба ва 2 та мағлубият қайд этди.