Ўзбекистонда стол тенниси бўйича халқаро йиғин ўтказилмоқда

Бу ҳақида Ўзбекистон стол тенниси федерацияси мутасаддилари сайтимизга маълумот беришди. 

Ўзбекистон стол тенниси федерацияси, Жисмоний тарбия ва спорт вазирлиги, Миллий олимпия қўмитаси билан ҳамкорликда, Осиё стол тенниси федерациясининг 2019 йилдаги "ITTF ASIA DEVELOPMENT PROGRAM" дастури асосида ташкил этилаётган ҳафталикда 10 ёшдан катта бўлган спортчилар халқаро ўқув-машғулот йиғинида қатнашишмоқда.

Ёшларни халқаро мусобақаларга тайёрлаш, истеъдодларини янада юксалтириш ва бой тажрибага эга бўлиш мақсадида ўтказилаётган "Марказий Осиё Олимпия умидлари" ҳафталигида стол теннисчиларимиздан ташқари, Марказий Осиё ва Эрон давлатларининг терма жамоалари иштирок этади.

Ҳафталик давомида терма жамоа аъзолари тактик-техник, жисмоний ҳолат бўйича назарий ҳамда амалий машғулотлар ўтказади. Эслатиб ўтамиз, мазкур ўқув машғулот йиғини мамлакатимиз ва Марказий Осиё давлатлари тарихида илк маротаба ўтказилмоқда.

Йиғин 27 декабргача давом этади.