02 май 16:16
Янгиликлар

Бошқалар

Ўзбекистонлик спортчи “Ҳоқон олтини-2021” раллисида муносиб иштирок этди

Теглар : Ралли

23-27 апрель кунлари Астрахан шаҳрида авторалли бўйича Россия чемпионатининг энг йирик ралли-рейдларидан бири ҳисобланувчи “Ҳоқон олтини–2021” босқичи бўлиб ўтди.

Ушбу босқичда “Дакар” ралли-марафонининг 18 карра ғолиби – “КАМАЗ-мастер” жамоаси ҳам қатнашди. Бу йилги “Ҳоқон олтини – 2021” раллисида ўзбекистонлик пойгачилар ҳам иштирок этди. Жумладан, Ўзбекистон Республикаси Туризм ва спорт вазирлигининг кўмаги ҳамда Ўзбекистон Миллий Автомобиль Клуби (ЎзМАК) томонидан тақдим этилган халқаро лицензия ёрдамида ҳамюртимиз Анвар Эргашев биринчи маротаба “Ҳоқон олтини-2021” пойгасида ўз омадини синаб кўрди.

Автопойгачимиз Т3 синфига мансуб Can-Am Maverick X автомашинасини бошқарган. Унга MARIA OPARIN жамоасининг тажрибали штурмани, беларуслик Андрей Рудницкий ҳамроҳлик қилди.

Умумий масофаси 851,26 км ни ташкил этган ушбу раллида иштирокчилар 4 кун ичида белгиланган масофани босиб ўтишди. 89 нафар иштирокчи орасида Анвар Эргашев ва унинг штурмани Андрей Рудницкий бошқарувидаги экипаж маррага Т3 синфида 5-ўринда етиб келган бўлса, барча синфлар орасида 9-ўринни эгаллади.

Мана шундай ажойиб кўрсаткич билан ҳамюртимизни муборакбод этамиз ва унга келгуси мусобақаларда омад тилаймиз.

Дарвоқе, Анвар Эргашев жамоасини олдинда ралли-рейдлар бўйича Жаҳон кубогининг навбатдаги босқичи – “Қозоғистон раллиси-2021” мусобақаси кутиб турибди.