Ўзбекистонлик теннисчи Дональд Трампда илиқ таассурот қолдирди

Мусобақаларда тошкентлик талаба-теннисчи Алан Гажиев ҳаракат қиладиган «Wake Forest» жамоаси ғолибликни қўлга киритганди.

«Wake Forest» жамоаси бунгача Америка Кубоги (залда), АCC конференциясининг мунтазам лигаси, ACC конференцияси кубоги ва Америка якуний кубоги мусобақаларида ғалаба қозонган. Эътиборлиси, 22 ёшли Алан Гажиев «Wake Forest» жамоаси таркибидаги ягона ўзбекистонлик теннисчи ҳисобланади. Ушбу муваффақият АҚШ Президенти Дональд Трампда катта таассурот қолдирди. Шу сабабли ҳам шахсан ўзи чемпионларни табриклашга қарор қилди. Ғолиблар Оқ уйдаги Овал хонада Трамп билан учрашдилар.

Трамп учрашув давомида спортчиларни табриклади, уларнинг ҳар бири билан суҳбатлашди ва суратга тушди. Якунда эса ўзининг ажойиб теннис корти борлигини ва йигитлар исталган вақт у ерга бориб, исталган вақтда машғулот ўтказишлари мумкинлигини айтиб ўтди.

Маълумот ўрнида, NCAA - Талабалар спорти миллий ассоциацияси - АҚШдаги коллеж ва университетларда спорт тадбирларини ташкил қилади. Таркибида мингдан ортиқ турли ташкилотлар мавжуд.