Ўзбекистонлик волейболчи Туркия клуби билан шартнома имзолади

Бу ҳақда Ўзбекистон волейбол федерацияси матбуот хизмати хабар қилади.

Исломжон Собиров 1995 йил 7 февраль куни Фарғона вилоятининг Ўзбекистон туманида туғилган. 2008 йилдан туман маркази Яйпан шаҳридаги 1-сонли болалар ва ўсмирлар спорт мактабида Мадамин Нишонов қўл остида волейбол спорти сирларини ўрганишни бошлаган.

У профессионал фаолиятини 2012 йил Тошкентнинг «Ориент» волейбол клубида бошлаган. Кейинчалик Самарқанднинг «Ўзтелеком» ва Олмалиқнинг ОТМК жамоаларида ҳам фаолият олиб борган. Шу йиллар ичида бир неча маротаба Ўзбекистон чемпиони ва кубогини қўлга киритган.

2014-2018 йиллар давомида Ўзбекистон давлат жисмоний тарбия ва спорт университетининг бакалавриат, 2018-2020 йилларда Нукус давлат университетининг магистратура йўналишларида таҳсил олган.

2013 йилдан Ўзбекистон миллий терма жамоаси шарафини ҳимоя қилиб келмоқда. Миллий терма жамоа сафида Исломжон Осиё ва халқаро турнирларда 71та расмий учрашувларда майдонга тушган. 2019 йил Марказий Осиё чемпионатида (Непал) мусобақанинг «Энг яхши ҳужумчиси» номинациясига сазовор бўлган. 2020 йилда Халқаро волейбол федерациясининг нуфузли агентликларидан бири “CAAN Athletics” билан ҳамкорлик шартномасини имзолади. Ушбу ҳамкорлик самараси ўлароқ И.Собиров Туркиянинг “Alanya BelediyeSpor” клуби билан шартнома имзолади ва Европа волейболи сари илк қадамини ташлади.

Биз ҳамюртимизга келгуси фаолиятида омад тилаймиз.