“Ўзкимёсаноат” АЖ: Ўзбекистон спортчилари учун 2,4 миллиард сўм ҳомийлик маблағи йўналтирилди

Бундан кўзланган мақсад 2024 йил Париж шаҳрида бўлиб ўтадиган XXXIII ёзги Олимпия ва XVII Паралимпия ўйинларига Ўзбекистон спортчиларини тайёрлаш, зарур шарт-шароитлар яратиш ва уларни ҳар томонлама қўллаб-қувватлашдан иборат.

Бугунги кунда “Ўзкимёсаноат” АЖ тармоқ корхоналари томонидан юқорида таъкидланган 2,4 миллиард сўм ҳомийлик маблағи белгиланган муддатларда Ўзбекистон Миллий олимпия қўмитаси ҳисоб рақамига тўлиқ ўтказиб берилди.

Ажратилган мазкур ҳомийлик маблағи Ўзбекистон Миллий олимпия қўмитаси томонидан тегишли талабномалар асосида спортчиларимизнинг 2024 йил Париж шаҳрида бўлиб ўтадиган XXXIII ёзги Олимпия ва XVII Паралимпия ўйинларига муносиб тайёргарлик кўришлари учун юртимиз ва хорижда ўқув машғулот йиғинларини самарали ташкил этиш, замонавий спорт инвентарлари билан таъминлаш ва барча зарур шарт-шароитларни яратиш мақсадида спорт федерацияларига йўналтирилмоқда.

Шу билан бирга, спорт федерацияларига ўтказилган маблағ ҳақида маълумотлар мунтазам равишда Ўзбекистон Миллий олимпия қўмитаси расмий веб-сайтидаги Очиқ маълумотлар рукнида эълон қилиб келинмоқда.

Эслатиб ўтамиз, жамият корхоналари томонидан йўналтирилган ҳомийлик маблағи Ўзбекистон Республикаси Президентининг 2021 йил 5 ноябрдаги “2024-йил Париж шаҳрида (Франция) бўлиб ўтадиган XXXIII ёзги Олимпия ва XVII Паралимпия ўйинларига Ўзбекистон спортчиларини комплекс тайёрлаш тўғрисида”ги ва 2022 йил 14 февралдаги “Ўзбекистон спортчиларини навбатдаги ёзги ва қишки Олимпия ва Паралимпия ўйинларида муваффақиятли иштирок этиш учун тайёргарлик қилиш ишларини жадаллаштириш тўғрисида”ги қарорлари ижроси доирасида амалга оширилди.