Паралимпия ўйинлари. Ўзбекистон делегацияси ичида бугунги вазият қандай?

Аммо, бугунги кунга келиб натижалар кутилганидан пастроқ кечмоқда. Olamsport.com сайти мухбири делегациямиздаги вазият юзасидан Ўзбекистон Паралимпия қўмитаси матбуот хизмати вакили Малика Муродова билан суҳбатлашди.

"Хабарингиз бор, шу кунларда Япониянинг Токио шаҳрида XVI ёзги Паралимпия ўйинларида Ўзбекистон паралимпия терма жамоасининг 48 нафар аъзоси 55 йўлланма билан ўз иштирокини давом эттириши керак эди. 

Лекин айрим вазиятлар сабаб 3 нафар дзюдочимиз, енгил  атлетика ва сузиш  турларидаги етакчи атлетларимиз афсуски мусобақаларда қатнаша олмади. Шу сабаб кутилган натижалар тенг баробар пастлаб кетди.

Дастлаб Нарита аэропортида делегация аъзолари ПЗР-тест синовларидан ўтказилганда пара дзюдочи Васила Алибоева ҳамда мураббий Шамсиддин Саидовда мусбат кўрсаткич аниқланиб, улар карантинга олинди. Ўйинлар ташкилий қўмитаси шартларига кўра, улар билан келган ва ён атрофида ўтирган жамоа аъзоларининг 22 нафари  эҳтиёт чораси сифатида изоляцияга олинди. Шунингдек  2 нафар спортчимиз пара енгил атлетикачи Бекжон Чеваров машғулот вақтида оёғидан жиддий жароҳат олди, пара сузувчи Дмитрий Хорлинда юрак хасталиги аниқланди. Шифокорлар иккала спортчининг  ҳам мусобақада иштирок этишини тақиқлашди.

Вазият мураккаб, ташкилотчилар томонидан қатъий назоратга олинган. Токио ҳукумати томонидан ажратилган масъул ходим изоляциядагиларини мунтазам кузатиб бормоқда. Бу ҳолат осон кечаётгани йўқ.

Делегациянинг медаллар борасида режалаштирган ва ғолибликка асосий даъвогар сифатида кўрилган атлетларнинг аксарияти бугунги вазиятдан келиб чиққан ҳолда, бор имкониятларидан унумли фойдалана олишмаяпти.

Мухлислардан ана шундай мураккаб вазиятда ҳам матонат кўрсатаётган терма жамоамиз аъзоларини қўллаб-қувватлашга чақириб қоламиз.

Янги Ўзбекистонга янги ғалабалар ёр бўлсин! Олға Ўзбекистон!", - деди Малика Муродова ушбу вазиятга изоҳ билдирар экан.