Париж-2024: Бекзод Абдураҳмоновнинг ўрнига Разамбек Жамаловнинг боришига изоҳ берилди

Спорт курашларида Олимпиада лицензияси спортчи учун эмас, мамлакат учун олинади. -74 кг вазн тоифасида Бекзод Абдураҳмонов томонидан қўлга киритилган лицензия учун энди Разамбек Жамалов Олимпия ўйинларида иштирок этади. 

Бугун ўтказилган матбуот анжуманида Спорт вазири Адҳам Икрамов шу масаладаги саволга жавоб берди. 

"Бу рақобат адолатли бўлди. Уларнинг рейтингига қаралди ва бу борада Разамбекнинг имкониятлари жуда яхши. Шу сабабли Олимпиадага уни юборишга қарор қилдик. 

Барчаси олдиндан айтилганди: Венгриядаги рейтинг турнирида ким яхши иштирок этса ўша Парижга боради. Разамбек Бекзод Абдураҳмоновни мағлуб этган спортчи устидан ҳам ғалаба қозона олди.

Бекзод Абдураҳмонов билан ҳам суҳбатлашдик ва бу уни тўғри қабул қилди", - деди Адҳам Икрамов.