Пойтахтимизда яна бир нуфузли халқаро шахмат турнири старт олмоқда

Умумий мукофот жамғармаси 68 700 АҚШ долларини ташкил қилувчи мусобақа уч гуруҳда ўтказилади. "Мастерс" гуруҳида рейтинги 2600 ва ундан юқори бўлган 6 нафар хорижлик шахматчининг иштирок этишига рухсат берилган. "Челленжер" гуруҳида рейтинги 2500, "Фьючерс" гуруҳида эса рейтинги 2400 ва ундан юқори 6 нафар хорижлик шахматчи қатнашади.

Мусобақа 9 раундли айланма тизимда ўтказилади. Ҳар бир иштирокчига 90 дақиқа вақт ажратилиб, биринчи юришдан бошлаб ҳар бир юришга 30 сонияли қўшимча вақт қўшилади. Шахматчилар 30-юришгача дуранг таклиф қилишлари мумкин эмас.

Кучлилар жам бўлган "Мастерс" гуруҳида FIDE байроғи остида қатнашадиган россияликлардан Владислав Артемьев, рапид бўйича амалдаги жаҳон чемпиони Володар Мурзин, арманистонликлар Хайк Мартиросян, Шант Саргсян сингари таниқли гроссмейстерлар бор. Бу гуруҳда юртимиз шарафини ёш гроссмейстерларимиздан Абдумалик Абдусалимов, Муҳиддин Мадаминов, Ортиқ Ниғматов ҳамда ёшлар ўртасида икки карра жаҳон чемпиони Афруза Ҳамдамова ҳимоя қилади.