Prague Masters. Нодирбеклар қўшҳоким, Якуббоев амалдаги тож соҳиби Гукеш билан ўйнади

Мазкур шахмат фестивали тоифасига қараб учта гуруҳда ташкил этилмоқда. Кучлилар жам бўлган "Masters" гуруҳида ўзбекистонлик гроссмейстерлар — Нодирбек Абдусатторов ва Нодирбек Якуббоев ҳам бош соврин йўлида муваффақиятли одимламоқда. Ҳар икки шахматчимиз биринчи турда ғалабага эришганди.  

Кеча ўтказилган иккинчи турда гроссмейстерларимиз номдор рақибларига қарши қора доналарда ҳаракат қилишди ва якунда дурангга имзо чекишди. Нодирбек Абдусатторов эронлик Парҳам Мақсудлу билан муросага келди. Нодирбек Якуббоев эса амалдаги жаҳон тожи соҳиби, ҳиндистонлик Гукеш Доммараджу билан дуранг қайд этди. 

Prague Masters 2-турида испаниялик Дэвид Антон нидерландиялик Йорден ван Форестни, 1-турда Абдусатторовга ютқазган ҳиндистонлик Аравиндҳ Читамбарам эса америкалик Ҳанс Мок Ниеманнни мағлубиятга учратди. Қолган партияларда томонла муросага келишди. 

Иккинчи турдан сўнг турнир жадвалида Нодирбек Абдусатторов, Нодирбек Якуббоев ва чехиялик Давид Навара 1,5 очкодан жамғариб, пешқадамлик қилишяпти. Икки Нодирбек қўшимча кўрсаткичларга кўра биринчи ва иккинчи ўринларни банд этган. 

Бугун 3-турда Нодирбек Абдусатторов оқ доналарда германиялик Винсент Кеймерга, Нодирбек Якуббоев эса америкалик Ҳанс Мок Ниеманнга қарши ўйнайди.