Prezident Cup. Чемпионлик тақдирига таъсир қилувчи 8-тур учрашувлари бошланди

Дунёнинг кўзга кўринган гроссмейстерлари мукофот жамғармаси 75 000 АҚШ долларини ташкил этувчи Prezident Cup мусобақаси бош соврини учун баҳс олиб боришяпти. Бироз аввал 8-тур партиялари бошланди. Кечаги ғалабаси эвазига пешқадамликни қўлга олган Жавоҳир Синдаров турнирнинг иккинчи сараланган иштирокчиси Ниҳал Сарин (Ҳиндистон, 2676)га қарши қора доналарда ҳаракат қилмоқда. 

Биринчи доскада мусобақанинг биринчи тартиб рақамли шахматчиси Нодирбек Абдусатторов оқ доналарда хитойлик Ху Мингуи билан муносабатларига ойдинлик киритиб оляпти. Кеча ўзбек дербисида Нодирбек Якуббоевни мағлуб этган Шамсиддин Воҳидов ҳинд шахматчиси Нилаш Саҳага қарши дона суряпти.     

Мусобақа якунланишига икки тур қолган бир пайтда Жавоҳир Синдаров ва Ниҳал Сарин 6 тадан очко жамғаришган. Шамсиддин Воҳидов ва Нилаш Саҳа ҳисобида 5,5 тадан очко бор. Айнан мана шу икки жуфтликдаги ўйин натижаси чемпионлик тақдирига катта таъсир ўтказади.