Prezident Cup. Синдаров яна пешқадам, дербида Шамсиддин мағлубиятли вазиятни ғалабага айлантирди, Абдусатторов эса...

Дунёнинг кўзга кўринган гроссмейстерлари мукофот жамғармаси 75 000 АҚШ долларини ташкил этувчи Prezident Cup мусобақаси бош соврини учун баҳс олиб боришяпти. Кеча 7-турнинг биринчи доскасида биринчи рақамли шахматчи Нодирбек Абдусатторов (2777) қора доналарда ҳиндистонлик Пураник Абҳиманю (2682) билан муросага келди. Нодирбек 5 очко билан ҳамон 6-ўринни эгаллаб турибди. Аммо чемпионлик учун имкониятлари пасайиб кетди. 

Мусобақада 7-тур олдидан қўшимча кўрсаткичларга кўра яна 1-ўринга кўтарилиб олган Ортиқ Ниғматов (IM, 2447) қора доналарда ҳиндистонлик гроссмейстер Ниҳал Сарин (2676)га ютқазиб қўйди ва турнир жадвалида 5-поғонага пастлади. Сарин ҳисобидаги очколар 6 тага етди ва у қўшимча коэфицентларга кўра 2-ўринга кўтарилиб олди. 

Бу турда ҳам ҳамюртларимиз иштирокидаги дербига гувоҳ бўлдик. Сўнгги турларни яхши ўтказаётган Шамсиддин Воҳидов (2681) Нодирбек Якуббоев (2668)га қарши муросасиз баҳсда мағлубиятни ғалабага айлантиришга муваффақ бўлди. Бу уларнинг ўзаро ўтказган 32-учрашуви бўлди. Қизиғи, иккала гроссмейстеримиз ҳам кечаги учрашувга қадар 10 тадан ғалабага эришганди. Шамсиддин кечаги ғалабаси эвазига ҳисобда олдинга чиқиб олди. Улар ўртасидаги 11 та партияда кучлар тенг келган.    

Бир тур олдин Нодирбек Абдусатторов билан дуранг ўйнаган Жавоҳир Синдаров (2682) 7-турда ҳиндистонлик Санкалп Гупта (2539) устидан муҳим ғалабага эришиб, турнир жадвалида 6 очко билан қўшимча кўрсаткичлар эвазига 1-ўринга кўтарилиб олди. Турнирда иккинчи рақам остида таснифланган эронлик таниқли шахматчи Парҳам Мақсудлу оқ доналарда ҳинд шахматчиси Нилаш Саҳа (2458) билан дуранг қайд этди. Парҳам ҳисобида 5, Нилашда эса 5,5 очко бор.