Prezident Kubogi. Марказий партиядаги дурангдан кейин пешқадам ўзгарди

Дунёнинг кўзга кўринган гроссмейстерлари мукофот жамғармаси 75 000 АҚШ долларини ташкил этувчи Prezident Kubogi мусобақаси бош соврини учун баҳс олиб боришяпти. А гуруҳида қўшимча кўрсаткичларга кўра пешқадамлик қилиб келган Ортиқ Ниғматов (2447) 5-турда нафақат Ўзбекистоннинг, балки турнирнинг биринчи рақамли шахматчиси Нодирбек Абдусатторов (2777)га қарши оқ доналарда ўйнади ва якунда дурангга имзо чекди. 

Бу икки шахматчимиз очколарини 4 тага етказиб олишди ва ҳамон мағлубиятсиз одимлашяпти. Пешқадамларнинг очко йўқотишидан Жавоҳир Синдаров (2682) унумли фойдаланиб қолди. Гроссмейстеримиз FIDE байроғи остида ҳаракат қилаётган россиялик Иван Землянский (2543)ни мағлубиятга учратиб, 4,5 очко билан турнир жадвалида якка карвонбоши бўлиб олди. 

Тўртинчи турда Нодирбек Абдусатторовдан очко тортиб олган Мурали Картекян (Ҳиндистон, 2625) бу сафар ватандоши Ниҳал Сарин (2676) билан дуранг ўйнади. Яна бир гроссмейстеримиз Муҳиддин Мадаминов (2501) иккинчи рақамли иштирокчи Парҳам Мақсудлу (Эрон, 2712)дан очко тортиб олди. Уларнинг партияси дуранг билан якунланди. Шамсиддин Воҳидов (2681) 5-турда россиялик Алексей Александров (2425)дан устун келди ва совринли ўринлар учун курашга қўшилди. Нодирбек Якуббоев (2668) эса ўз сингари 3 очко тўплаган қозоғистонлик Аристанбек Уразаев (2480) билан муросага келди. 

Олтинчи тур олдидан Жавоҳир Синдаров 4,5 очко билан якка пешқадам бўлиб олди. Саккиз шахматчи - Ортиқ Ниғматов, Мурали Картикян, Саҳа Нилаш, Ниҳал Сарин, Нодирбек Абдусатторов, Санкалп Гупта, Виталий Бернардский ва Сапармират Атабаев 4 очкодан жамғаришган. Абдусатторов қўшимча кўрсаткичларга кўра 6-поғонадан жой олган.